"Aurten lehenengoz ekarri dugu erremontea Bergarara –ekainean jokatu zuten Bergaran erremonte kopako partidu bat, eta Oñatin izan zen finala–. Egia da pilotalekuan ez zela jende mordoa egon, baina bertan egon zirenak oso gustura geratu ziren pilotariek eman zuten ikuskizunarekin, eta kirol horren aldeko apustua egin dugu", adierazi du gaurko aurkezpenean Martin Etxeberria kirol zinegotziak.
Hala, abenduaren 24an, 17:00etan hasita bi atzelari izango dira aurrez aurre, Urrutia eta Lizaso (12 euro). Abenduaren 25ean, 17:30ean, aurrelarien txanda izango da, Ezkurrak eta Zeberio II.ak jokatuko dute (12 euro). Bi kanporaketa horietan nagusitzen diren erremontistek abenduaren 26an jokatuko dute finala, Iruñeko Labrit pilotalekuan (16:45), eta ETBk eskainiko du norgehiagoka hori.
Buruz buruko partiduetan ohi moduan, partiduak 35 tantora izango dira, eta partidu nagusia baino lehen binakako partiduak jokatuko dituzte, bai hilaren 24an eta baita hilaren 25eko jaialdian ere.