"Txarto jokatu dugu", halaxe laburtu zuen Manu Diaz entrenatzaileak partidua. "Geure aukerak aprobetxatzen ez dugu jakin izan eta ia ezer egin barik lau gol sartu dizkigu Idiazabalek". Gainera, oso haserre zegoen epailearen lanarekin: "Bi penalti adierazi dizkigu eta geuri egindakoa ikusi ez; nazkagarria, benetan. Eta nekatuta gaude halako jarrerekin".
Lehen gola jokoz kanpo
Idiazabalen lehen gola 23. minutuan iritsi zen: "Epaileak berak onartu zigun gero, jokoz kanpo sartu zutela". Ondoren penaltia adierazi zuen bergararren aurka baina kanpora bota zuten. Eta 40. minutuan bigarren gola iritsi zen (2-0). Gainerako golak, bigarren zatian sartu zituzten. Lehenengo kontraerasoan Idiazabalgoek 3-0 egin zuten eta partidua bukatzeko hamar minutu geratzen zirenean Urteagak bergararren gol bakarra sartu zuen (3-1). "Ondoren geuri egin ziguten penaltia, baina epaileak ez zuen halakorik ikusi", zioen Diazek. Eta partiduaren azken minutuan Idiazabalen aldeko penaltia adierazi zuen. Hala, 4-1 galdu zuen Bergarak.
Bosgarren jardunaldian Vasconia hartuko dute etxean Manu Diazen mutilek, azkenengo dagoen taldea. Zaleen laguntzarekin irabazi eta puntuak eskuratzea dute helburu.