Jose Luis Elkororen aldeko herri-bazkaria domekan da, Bergarako frontoian. Bazkariaren helburua da ospatzea Elkoro etxean dagoela. “Mugimendu handia izan da Jose Luisen aldeko plataformaren inguruan; Jose Luis ez dago libre, baina etxean dago eta uste dugu hori herriaren garaipena izan dela, eta hori ospatu egin behar dela”, adierazi du Maite Aristegik, Mugituko da plataformako kideak.
Elkoro "presente" egongo da
Hark gogora ekarri du Jose Luis Elkoro bera ez dela egongo bazkari horretan, “baldintza oso zorrotzak” ezarri dizkiotelako. “Baina presente egongo da gurekin eta gure barruetan”, gaineratu du.
Ikurrina etxeetan
Bestalde, dei berezia egin dute egun horretan Bergarako etxeak Ikurrinaz janzteko, Elkororen ibilbide historikoa aintzat hartuta: “Jose Luisen ibilbide historikoaren hasieran herria hobetzeko eta herriaren alde lan egiteko auzo-lan handia zabaldu zuen, tartean Ikurrina legeztatzearen aldeko mugimendua; eta ezin dugu ahaztu Bergara izan zela Ikurrina altxatu zen lehen lekua”.