Goiko trenbidean musika taldeendako egokituko dituzten entsegu lokalak erabiltzeko araudia onartu zuen udalbatzak, aho batez, astelehenean egindako osoko bilkuran.
Hala, lokalok erabiltzeko, talde bakoitzeko kide guztiek 16 urtetik gora izan beharko dute eta gutxienez, talde bakoitzeko kideen erdia Bergarakoa izan beharko da. Horrekin batera, 30 euro ordaindu beharko dute hileko kuota gisa, eta entsegu ordutegia izango da: astelehenetik domekara, 10:00-22:00. Bestalde, lokal bakoitzak –zortzi egokituko dituzte–, gutxienez, hiru talderi emango die zerbitzu.
Goiko estazioko eraikina erabiliko duten musika taldeak Goiko Rock elkartean batu dira eta haien lehendakari Eugenio Pelicano –Lord Witch taldea– izango da. Hala, elkarte horrek hartuko ditu beregain: garbiketa lanen gastua eta argiarena.
Egokitze lanak gaur hastekoak ziren eta bukatu arte –bost bat hil– Jamen entseatuko dute taldeek.