Aurreko urteekin alderatuz, aurtengo Pazko jaietan herritarren parte hartzea handiago izan dela azpimarratu dute jai batzordeko kideek. Eguraldia lagun izan ez arren, jendeak erantzun ona eman duela gogoratu du Enara Minguez Kultura zinegotziak. Jai batzordearen ustez, asteleheneko herri bazkaria eta zezen plazako errekortadore eskola izan dira jaietako ekitaldi jendetsuenak.
Herriko kaleetan jarritako banderatxoak, gune ezberdinetan ipinitako
egitarau kartelak eta batez ere herriko sarreran jarritako ongi etorri
kartelak aurtengo Pazko jaiak girotzeko balio izan dutela azaldu dute
jai batzordeko kideek. Jaien balorazio ona egin dute.
Bestalde, jai batzordeak bultzatuta txosnetan edalontzi berrerabilgarriak jarri dituzte aurten lehenengoz. Esperientzia ona izan dela kontuan hartuta, datorren urteari begira tabernetara luzatu gura dute gonbidapena. Edalontzi berrerabilgarriekin txosna gunean sortutako zaborra gutxitu dela konturatu dira; hala, datorren urteari begira kaleetan sortzen den zaborra ere gutxitu gura dute.