Eskuorri berrietan informazioa osatuagoa da; betiko monumentuak agertzen dira, baina ikuspegi zabalagoa eman guran, beste era bateko informazioa ere agertzen da: auzoei, kultur ekitaldiei eta Agorrosingo spari buruzkoa eta tostoi eta errellenoen zein herriko jaien inguruko azalpenak adibidez. Errepideei buruzko informazio praktikoaren berri ere ematen da: hiriburekiko distantzia, errepide sare nagusia, Bergarara nola heldu...
Eskuorriaren bost edizio egin dira, bost hizkuntza ezberdinetan: euskarazko bertsioan 4000 ale, gaztelerazkoan 6000, katalanez 3000 frantsezez 3000 eta ingelesez beste 3000.
Postalak eta poltsa
Hiru postal desberdinez osatutako sorta ere kaleratu du Udalak, herriko txoko bitxi eta ederrenetako imajinekin, eta baita turismo bulegoaren poltsa ere, San Martingo plaza oinarri hartuta diseinatu dutena. 1000 postal sorta kaleratu dituzte, poltsak berriz, 3000. Udaletik eskerrak eman nahi izan dizkiete material hau lantzen lagundu duten Benito Cantero eta Felix Idigoras argazkilariei.
Turismoa dinamizatu
Mikel Elkoroberezibar Bergarako turismo zinegotziak adierazi duenez, orain arte herrian turismoa bultzatzeko ekindako ekimenak onak izan diren arren, Udalaren asmoa da urrats bat haratago joatea. Hala, materiala berriztatzea lehenengo pausu bat izan dela esan du, baina gaineratu, aurrera begira beste hainbat ekimen ere prestatzen dabiltzala. Turismo plan bat egiteko asmoa ere azaldu du Elkoroberezibarrek.