2007an balio erantsiko oihalen produkziorako 1,6 milioi euro bideratu zituen Tavexek. Luxuzko denim merkatuan, epe ertainera, %10eko kuota lortzea da helburua. Besteak beste, Giorgio Armani, Tommy Hilfiger edo Diesel Tavexeko bezeroak dira gaur egun. Amaitutako janzkiak dira haien eskarietako bat gaur. Full Package edo zerbitzu integrala deritzon saila sortu du Tavexek: bezeroak modelagintza aukeratu eta gero, konpainia da produkzioaren arduraduna: jantzigintza, materia primen logistika eta bezeroen zehaztapenei kasu eginez eskaerak betetzea.
Hamaika lantegi
Fabrica de hilos, tejidos y estampados de Bergara 1846an sortu zen; 1901ean, Algodonera de San Antonio bilakatu zen eta 1989an Tavex multinazionala. Tavex Korporazioa 2006an jaio zen, Tavexen eta Brasilgo Santista Textil batuketaren ondorioz. 11 lantegi dituzte Europan, Afrikan eta Amerikan, 390 milioi euro inguruko fakturazioarekin eta 6.000 lagunetik gorako lan taldearekin.