''75 pilotu inguru zeuden izena emanda, beste inon baino gehiago. Baina azkenean, eguraldi iragarpenaren eta alerta horiaren ondorioz, erdia inguru atzera bota dira'', adierazi zuen lasterketa amaitutakoan Asier Blazquez, Bergara Hiria moto-kros txapelketako antolatzaileetako batek. ''Ikusle aldetik, nahiko jende gerturatu da, baina lokatzak ikusgarritasuna kendu dio lasterketari',' gaineratu zuen.
Faboritoak, kanporatuak
Mx-1 kategorian, kategoria nagusian, zortzi pilotu lehiatu ziren. Bigarren txandan Oscar Diaz eta Rogers Carrasco, lasterketan buru zeudenak eta Euskadiko Txapelketa irabazteko faboritoak, kanporatu egin zituzten. Azkenean, Jokin Barandiaranendako izan zen garaipena, eta Zugaitz Salegi bergararra bigarren sailkatu zen.
Mx-2 kategorian bestalde, Aingeru Gonzalez izan zen nagusi, eta hirugarren, Xabier Abasolo arrasatearra geratu zen.
Abendura bitartean, gehiago
Zapatuan ikuskizun gosez geratu zirenek abendua baino lehen izan dezakete berau asetzeko aukera, antolatzaileek aurreratu zutenez, posible baita Bergaran beste bi txapelketa jokatzea.