Aurreko agintaldiaren gestioa "presidentzialistatzat" jo zuen Barrusok: "Ez dugu ondo ikusten pertsona bakarra izatea erreferente nagusia. Hainbat proiektutan, kontrol politiko eza nabaria izan da. Maiatzean heldu ginen udaletxera, eta herentzian hainbat arazo jaso ditugu, arazo zaharrak, denbora muga zorrotzekin; horren adierazle da eskolen azpiegiturarekin gertatutakoa".
Herrigintza berreskuratu
EAEk Udalean dituen sei zinegotziak izan ziren asteleheneko prentsaurrekoan. Azken urteotan defizit demokratikoa nabaria izan dela adierazi zuen alkate berriak: "Herritarrak ez dituzte kontuan izan, ezta udalbatzako beste alderdiak ere". "Eskuineko baloreak" garatu izan direla azpimarratu zuen Barrusok.
Oposizioari ateak zabaltzeko gertu azaldu ziren EAEko zinegotziak, demokrazia parte-hartzailea bultzatzeko asmoz. Herritarrek ere zeresana izango dute. Esaterako, ordenantza fiskalak direla eta, bi bilera deitu dituzte osoko bilkuren aretoan, hilaren 14an eta 21ean, 19:30ean. Aurrekontuak lantzeko orduan, herritarren iritzia jakin nahi dute: "Herrigintza kontzeptua berreskuratu nahi dugu". Azkenik PSE-EEren oposizio "populista" salatu zuten, eta azaro erdialderako auditorioaren eta Mizpirualde egoitza handitzearen exekuzio proiektuak eskuartean izango dituztela aurreratu zuten.