Bi urteko lana
Bi urte eman ditu margolari bergararrak Bilboko erakusketa prestatzen. "Lan mardula" izan dela esan digu, baina gustura geratu dela: "Pinturan hasi nintzenean arkitektura nuen oinarri. Garai hartako margoak ikus ahalko dira. Bilakaera baten ondorioz, arkitektura naturarekin ordezkatu dut. Hasierako lanetan eraikinak ziren protagonista. Azkeneko lanetan natura, zuhaitzak, zerua... dira nagusi. Bilakaera hori da erakutsi gura dudana, eta hori erakutsi ahal izateko bi urteko lana egin dut. Lan mardula izan da, baina gustura nago emaitzarekin. Ea bada, ikusleek erakusketaren izenburuak dioen bilakaera ikusteko gai diren".
Artelanekin batera, 2008an egindako 28 zirriborro jarriko ditu ikusgai, erakusketaren osagarri moduan. "Erakusketarako aukeratu ditudan koadroetan, ez da islatzen lan bakoitza egiteko bizi izan dudana. Sentimendu guztiak margolanetan batzea oso zaila da. Hori horrela, alor pedagogikoa lantzeko, gela berezi bat jarriko dugu margolan batzuen zirriborroekin. 28 lan egiteko jarraitu dudan prozesua erakutsi nahiko nuke. Estudioan bizi izandakoa, alegia", esan digu.
Bestalde, irudiz jantzitako katalogo bat jarriko du, margolan bakoitzaren gaineko testu batekin. "Lan bakoitzaren gaineko informazioa laburbildu dut. Hain justu ere, margolan bakoitzaren gaineko zertzeladak", dio Lazkanok.