Orain arteko larrialdi plana eguneratu egin du Udalak. "Aurreko planak 10 urte zituen eta denbora horretan herria aldatu egin denez, eguneratu egin dugu", azaldu du Agurne Barrusok.
Larrialdi plan horrek jasotzen du uholde, sute edo istripu larri bat dagoenean, adibidez, nola jokatu. "Batetik jasotzen du horrelako egoera bati aurre egiteko Udalak zer baliabide, dituen, langile eta material aldetik. Baita herrian dauden baliabideak ere. Adibidez, hormigoia egiteko aparailua behar izanez gero, badakigu nortzuk duten eta nora deitu dezakegun hori lortzeko", dio Alfonso Alonso udaltzainburuak. "Bestalde, horrelako egoera baten aurrean sortzen den "krisiaren mahaia" nortzuk osatzen duten ere jasota dago. Alkatea, udaltzaina, Jaurlaritzako teknikari bat eta hirigintzako edo dagokion arloko teknikaria egongo dira. Ardura nagusia alkateak du", jarraitu du Alonsok.
Berrikuntza
Plan honek gasa mozteko puntuak herriko zein tokitan dauden ere jasotzen ditu; aurreko planean ez ziren agertzen puntu horiek.
Herriko larrialdi plan berri hori joan den asteleheneko ez ohiko osoko bilkuran onartu zuen udalbatzak. EAJ abstenitu egin zen, "aldaketak ez dizkigulako inork azaldu", Juanjo Arrietak esan zuen moduan. Beste alderdiek alde bozkatu zuten.