Eusko Jaurlaritzaren Industria saileko Sprilur sozietate publikoak prest du Bergarako Larramendi industrialdea; uztailean amaitu zituzten 300.000 metro koadroko gunea eraikitzeko lanak. Gipuzkoako industrialde handienetakoa da eta Eusko Jaurlaritzak du hori kudeatzeko ardura. Printzipioz, enpresa handiak hartuko ditu, hala eta guztiz ere, bertan instalatzeko interesa agertzen duen enpresa oro jar daiteke Sprilurrekin harremanetan. Debagoieneko Industrialdeko gerente Fernando Narzisok esan du Debagoiena kokapen estrategikoa dela horrelako industriagune erraldoi baterako, bailarako kooperatibak hornitzen dituzten enpresek aurrerantzean Bergaran ezartzeko aukera izango dutelako.
Sprilurrek Bergaran egiten duen bigarren industrialdea da hau: Labegaraietakoa eraiki zuen aurretik, eta Larramendikoa etorri da orain. 25 milioi inbertitu ditu Sprilurrek bertan eta bederatzi lursailetan banatuta dago. Bederatzi horietatik baina, lau banatu daitezke gehienez. Bergarako Udalari lur zati bat dagokio eta aztertu egingo du zer egin: han eraiki eta erabili, edota Sprilurri saldu. Hori bai, hainbat zerbitzu mantentzeko ardura izango du Udalak, argiteria eta bideen mantenimendua, esaterako.
Lanok bi urte inguru iraun dute eta industrialdeko ingurua erabat urbanizatu dute: biribilgunea, Larramendira sartzeko bidea, poligono barruko bide nagusia eta aparkalekuak egokitu dituzte, besteak beste. Udazkenean inauguratuko dute industrialde berria.