Neurri horiek salatzeko, LAB sindikatuak kontzentrazioa egin du gaur eguerdian Arcelor lantokiaren kanpoaldean. Jose Luis Loidi LABeko ordezkariak esan du Bergarako lantegian 50 langile inguruk galdu dutela lana. Gehienak azpikontratatutakoak direla, baina beste hiru langile behin behinekoak direla gaineratu du.
Etekinak izan ditu enpresak
"Pentsatzen dugu, etekinak beste modu batera erabilita arazo sozialari beste irtenbide bat eman ahal zaiola, hain traumatikoa ez dena. Kontuan hartu behar da iaz Bergarako lantegiak 65 miloi euroko irabaziak izan zituela, eta aurten, irailera arte 40 miloi euroko irabaziak izan dituela", adierazi du Loidik. "Gure ustez, etekin horiek izateko behin behineko langileen ekarpena beste guztien berdina izan da", gaineratu du. LABeko ordezkariaren ustez, Olaberriako enpresa erreferentzia izan behar da auzia kudeatzean. Eskatzen dute, behin behineko langileen egoera behin betikoen bera izatea.
Enpresak dioena
Arcelorreko komunikazio arduradun den Ignazio Agredak esan digu enpresak ez duela "inor kaleratu". Erainkuntza krisiaren ondorioz, lan zama jaitsi dela aitortu du eta ondorioz hainbat enpresekin lan harremana moztu dutela. Gaineratu du langile horiek ez dutela zertan lan barik geratu behar.
Behin behineko langileen kasuan, esan du urteko garai honetan ohikoa dela behin behineko langileak kaleratzea.
Lan zama %40 inguru jaitsi da
Arcelorreko zuzendaritzak onartu du Gipuzkoako lantegien lan zama %40 inguru jaitsi dela azken hiruhilekoan.