Kontzertu sorta bereziek osatuko dute urteurren ospakizunen muina. Hala, Bilbo, Gasteiz eta Tolosako bandek kontzertuak egingo dituzte herrian datozen hileetan. Hain zuzen ere, hiru taldeek harreman estua dute Bergarako bandarekin. Bergarakoek, baina, uztailaren 15ean egingo dute jaialdi handia. Ondoren, bandako egungo kideekin eta ohiekin bazkari herrikoia egingo dute.
Bandaren historia liburu baten
Liburua eta diskoa ere kaleratuko dute Udal Bandakoek aurten. Juan Luis Bikuña kazetariak idatziko du bandaren historia azalduko duen liburua. Euskaraz eta erderaz, 200-300 orritan Bergarako kazetariak taldearen bizitza jasoko duen liburu "arin eta irakurtzeko atsegina" izango dela aurreratu zuen atzoko prentsa aurrekoan. Irailaren 15erako gertu izan gura dutela ere gehitu zuten aurkezpenean. Azaroan, aldiz, diskoa kaleratuko dute, bandak urteetan zehar jotako hainbat piezarekin. Zehazki, Miguel Gonzalez Bastida eta Alfredo Gonzalez Chirlaquek konposatutako 8 pieza izango dira. Maiatzean ekingo diete grabaketei.