Josu Bergara bakarlari bilbotarra izan zen Jam aretoaren etapa berriari hasiera eman ziona. Bakarka -akustikoan-, binaka zein taldekide guztiekin batera eskaini zituen Beldurra, Nora zoaz edo Hego haize bezalako kantuak. Gaueko izarra, baina, Ken Zazpi zen; Josu Bergararen kontzertuaren bukaeran hasi baitzen Jam aretoa betetzen.
Eñaut Elorrietak eta beste taldekideek eszenatokia zapaltzearekin batera piztu zen zoramena, bereziki jarraitzaile gaztetxoen artean. Akustika eta soinua itzelak, eta taldekideen eszenaratzea ere bikaina. Han ez zen giroa berotu beharrik izan, hasieratik zegoen-eta pil-pilean atmosfera. Iazko urtarrilean Donostiako Victoria Eugenia antzokian grabatutako Zazpi urte zuzenean diskoa aurkeztera etorri zen taldea Bergarara eta diskoan bildutako abestian izan ziren kontzertuaren ardatza: Nozbait, Gernikan, Ez nau izutzen, Gaueko argiak, Zapalduen olerkia edota Bihar.
Ezin ukatu Eñaut Elorriaga abeslaria dela taldeko arima. Eszenatokitik jendartera helarazten dituen indarra, sentimendua eta grina dira beste batzuen artean Ken Zazpik zuzenekoan duen arrakastaren arrazoi nagusienetariko bat.
Ia bi orduko kontzertua izan zen. Ikusleek gehiago eskatzen zuten, baina taldekideek badakite hobeto dela jendea gogoz uztea, larregi ematea baino. Atzo da bihar izan zen amaitzeko aukeratu zuten abestia. Ilargia abesti ezaguna, ez zuten eskaini.