'Jose Luis Elkoro libre!' aldarrikatu zuten Dueñasen

Atzo, domeka, 300 bat lagun Dueñasko (Palentzia) espetxeraino joan ziren Jose Luis Elkoro bergararrari elkartasuna adieraztera, 'Jose Luis Elkoro Libre!' plataformak deituta. Elkoro 2009ko maiatzean atxilotu zuten 18/98 sumarioagatik eta ordutik espetxean dago. 75 urte ditu eta osasun arazo larriak.

Domeka goizean lau autobus irten ziren herriko plazatik eta beste hainbat bergarar autoetan joan ziren. Hara heltzean, Gaztelako ezkertiarrekin bat egin eta La Moraleja espetxeraino lau kilometroko ibilaldia egin zuten,  erraldoiak, trikitilariak, ikurrinak eta Gaztelako komuneroen banderak lagunduta. Pankarta Agurne Barruso alkateak, PSE-EEko zinegotzi izandako Antonio Herzogek, EAko Juan Mari Garitanok eta Aralarreko Rafa Santxezek eraman zuten.

Espetxe parean

Espetxe parean agertoki txiki bat inprobisatu eta bertan Doris Benegasek eta Juan Mari Elexpuruk Jose Luis Elkoro, Gerra Zibila eta Euskal Herriaren historia izan zuten hizpide. Espetxekoekin ere komunikatu ziren.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.