Juan Kruz Mendizabal eta Iñigo Mitxelena herriko bi abadeek badituzte ordezkoak. Jon Molina, aretxabaletarrak eta Iñaki Amutxastegi debarrak hartuko dute haien lekua, nahiz eta izendapena ez den ofizial egingo uztail amaierara arte, Juan Kruz Mendizabal apaizak azaldutakoaren arabera.
Jon Molinak 40 urte ditu eta Arrasaten dihardu abade gaur egun. Iñaki Amutxastegik, berriz, 36 urte ditu eta Donostiako Altza auzoan ari da.
Juan Kruz Mendizabalek gehitu duenez, irailean etorriko dira apaiz berriak herrira, San Martin jaien aurretik, baina data finkorik oraindik ez dagoela ere gehitu du.
Bi apaizok egingo dira kargu Bergarako San Pedro eta Santa Marina parrokiez eta Elosu auzokoaz, eta Antzuolako parrokiaz eta Uzarragaz auzokoaz.
Juan Kruz Mendizabalek esan duenez, apaiz berrien ongi etorria eta bere eta Mitxelenaren agurra meza baten bidez egingo dute eta meza hori emango du Jose Ignacio Munilla gotzainak.
Mendizabalek Donostiara joateko lagako du Bergara, bikario izendatu dute-eta eta Mitxelena Leireko monasteriora doa.