Gaztelania, euskara eta ingelesa ardatz izango dituen hezkuntza sistema datorren ikasturtetik aurrera ezarriko du Eusko Jaurlaritzak EAEko 40 ikastetxetan. Eredu horrek hiru hizkuntzak maila berean jartzen ditu, hau da, hirurei ordu kopuru bera eskainiko zaie. Euskal Herri Bere Eskola (EHBE) herri ekimenak eredu horren aurka agertu da, Isabel Zelaa Hezkuntza sailburuaren ereduak euskara gutxiesten duela uste du-eta. Bada, atzo ekitaldi kulturala egin zuten Munibe plazan, hezkuntza sistema propioa aldarrikatzeko.
Haurrendako jolasak, Enaitz Alustiza bertsolaria, trikitilariak eta erdarazko hezkuntzaren inposizioa irudikatzen zuen antzerkia egin zuen EHBEk egubakoitzean. Jende dezente izan zen ekitaldian; antolatzaileak, pozik.
Eskualde autobusa datorren zapaturako
Hiru eleko sistemaren aurka eta hezkuntza sistema propioaren alde martxoaren 13an Bilbon egingo den manifestaziorako eskualde autobusa antolatu dute: Aretxabaletan (15:30), Arrasaten (15:45) eta Bergaran (16:00) geratuko da. Izena emateko Aretxabaleta, Arrasate eta Bergarako euskara elkarteetara eta zenbait ikastetxe eta tabernetara (oraindik ez dute zehaztu non) jo behar da.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
