Eskaintza zabala du euskara elkarteak. Aisialdiarekin lotutako ekintzei dagokienez, hainbat talde daude: Txapligu taldea laugarren mailatik seigarren mailara artekoendako da eta zapatu eta domeketan jolasak, eskulanak... egiten dituzte 16:00-20:00 ordutegian.
Txiskrilabi taldean, berriz, DBHko gaztetxoek euren aisialdia antolatzeko aukera izango dute eta hilean bi ekintza egiten dituzte, irteerak direla, tailerrak direla, ...
Azkenik, Gazte taldea ere badago, 16 urtetik gorakoendako.
Hiru eskola ere baditu Jardunek: bertso eskola (haur eta nagusiendako taldeak), trikiti eskola (soinu eta pandero eskolak) eta dantza eskola (haurrendako taldekako euskal dantzak).
Horrez guztiaz gain, euskara errefortzuak ere badaude; haurrendako saio didaktikoak dira euskararen erabilera hobetzeko eta suspertzeko. Eta Berriketan egitasmoa ere bai, non astean behin, taldetxotan batuz, euskaraz mintza praktika egiten duten euskaldun berriek zaharrekin.