Erabaki dute aurtengo Mendekoste jaietako egitarauak zein irudi izango duen. Irene Abad Pinedaren marrazkia aukeratu dute horretarako. Irudia aukeratzeko, kartel lehiaketa antolatu zuen kultura sailak eta Irene Abaden marrazkiak irabazi du lehiaketa hori. Guztira 29 kartel aurkeztu zituzten lehiaketara.
6.000 egitarau
Orain kultura etxean dago ikusgai kartel irabazlea, eta laster etxeetan banatuko dituzten jaien egitarauaren azalean ikusiko dugu. Egitarauaren 6.000 ale aterako ditu kultura sailak eta herriko etxeetan banatuko dituzte guztiak. Maiatzaren 14ko astean hasiko dira banaketa egiten eta aste horretako domekarako, maiatzaren 20rako, Bergarako kale eta auzoetako etxe guztietan izango dute Mendekoste jaietako egitaraua. Jaiak, hilaren 25etik 29ra izango dira.
Bestalde, jaietan txosna jarri nahi dutenek, txosna jartzeko eskaera egin behar dute udaletxean. Maiatzaren 10ean, 12:00etan, da eskaera egiteko azken eguna. Eskaera orriak eta baldintza pleguak udaletxeko idazkaritzan jaso daitezke.