Irabazleek, saria jasotzeko taula gainera igo ahala, idatzitako gutunak irakurri zituzten. Gaiak desberdinak, baita eskenatokiak ere, baina, gaia berbera guztietan ere: maitasunak gure barrenean sortzen dituen gorabeherak eta, askotan, saminak. Izan ere, lau gutun irabazleek istorio garratzak kontatzen dituzte; maite duten pertsonaren alboan egon ezinak sortzen duen mina irudikatzen dute hiruek ere.
Sari nagusia Imanol Sorondo hernaniarrak eroan du; gutunaren protagonistak azkenean ere onartu egin behar izan du maite duen pertsonarekin izandako amodiozko istorioa amaitu egin dela. Bigarren saria, berriz, Ordizioara joan da Leire Mendizabalen eskutik.
26 urtetik beherako gutun irabazlea entzutean begirada goibela sumatu zitekeen kultura etxean elkartutakoen artean. Minbizia du hizpide Nagore Gonzalez legazpiarraren idatziak. Koma egoeran dagoen emazteari gutuna idazten dio Unaik eta euren semearen inguruko gorabeherak kontatzen dizkio. Sentimenduz betetako istorio gazi-goxoa.
Bergararrendako ere egon da saririk; Uxue Agirre eta Elene Etxanizek idatzitako lanarendako, hain justu. Gaia, atxilotuta kartzelara eroan duten senarraren falta.
SMS bidezko mezurik onena, bestetik, Ibon Segura eskoriatzarrak idatzitako izan da: Zure begiek hitz egitn dutnean, nire ezpaink ezin dute hitzik asmatu.