Aurrera doaz E Planaren baitan birgaituko den Irizar jauregiko lanak. Goitu Eraikuntzak SL enpresak dihardu lanok egiten, Zetabi Arkitektura Bulegoaren zuzendaritzapean.
Hain justu, Zetabitik azaldu dutenez, Irizar inguratzen duen lorategiko itxidura zati bat bota dute eta obrak iraungo duen denborarako metalezko itxitura berria egin dute, eraikitze prozesuan materialak, karga eta deskarga guneak, txabolak... edukitzeko.
Beste alde batetik, solairuetako tabikeria kentzen ere hasi dira, tabike artean ezkutatuta zegoen egurrezko egitura originala tratatu ahal izateko eta beharrezkoa den guneetan indartzeko. Zetabikoen arabera, dagoeneko hirugarren solairuko tabikeria bota dute.
Lanok maiatzaren 12an hasi zituzten eta abenduaren 10erako bukatzea aurreikusi dute.