Irala kaleko lanak, Gabonen osterako

Irala kaleko dendariek eskatuta, Gabonen ostean jarraituko dituzte Irala kaleko urbanizazio lanekin. Aretxabaletako Construcciones Amaral de Sousa enpresari adjudikatu zizkioten lanak, 1.379.220 eurotan, eta zortzi hilabete inguru iraungo dute.
Gogoratuko duzuenez, Lasarteko Ozio enpresak hasi zituen aipatutako lanak aurreko abenduan; hala ere, lanak eten egin zituzten apirilean, Ozio enpresak uko-agiria aurkeztu zuen-eta. Jarraian, ordura arte egindako lanak tapatzea erabaki zuen Udalak apirilean, berriro lanekin hasi bitartean eta, besteak beste, herriko jaiak gertuan zirelako. Dendariengan eta herritarrengan sortutako kalteak nabariak ziren, kexa ugari jaso baitzituen Udalak sasoi hartan.


Hasieran, Kilometroen ostean

Ondoren, udako oporren aurretik, Aretxabaletako Construcciones Amaral de Sousa enpresari adjudikatu zizkioten lanak, 1.379.220 eurotan. Aranzadi ikastolaren aldeko Kilometroak jaia urriaren 7an ospatzen zenez, lanak geroko uztea erabaki zuten Udaleko ordezkariek.

Hala ere, orain arte sortutako kalteak direla eta, dendariekin eta bizilagunekin bilera egin nahi zuten Udaleko arduradunek. Bilera hori urriaren 3an egin zuten eta hantxe izan ziren, besteak beste, Agurne Barruso alkatea eta Enara Minguez Gobernazio batzordeburua, Iralako proiektua egin duen BEB Arkitektoak enpresako ordezkariak, Eli Zubeldia Udaleko Obra eta Zerbitzuburua, Juan Inazio Galdos Hirigintzako teknikari orokorra eta Amaraleko ordezkariak. Bilera haren ostean lanak berriro atzeratzea erabaki zuten.

Dendarien galerak

Dendarien partetik Josu Arteaga Tantana dendakoak hau adierazi digu: "Dendariok galera mordoa jasan ditugu azken urtebetean eta iaz egin zuten moduan, onena Gabonen ostean lanekin jarraitzea da, ordura arte behintzat kalea txukun samar egoteko" .

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.