"Inoiz baino jende gehiago ibili da, eta badirudi egunak tokia jan diola gauari"

Mendekoste jaiak dagoeneko amaitu dira eta Udaleko Kultura Sailak adierazi digunez, "balorazioa oso positiboa" da, eta azpimarratu nahi izan dute jendearen "parte-hartze handia". Egindako eguraldi onagatik-edo "badirudi egunak tokia jan diola gauari, eta, egunez inoiz baino jende gehiago ibili den neurrian, gauak jaitsi egin dira", adierazi digu Enara Minguezek, Kultura zinegotziak. Bestalde, asteleheneko parte-hartzea nabarmentzekoa dela esan digu. "Tabernen arteko herri kiroletan zazpi tabernak hartu zuten parte eta Etxagi tabernak irabazi zuen. Ondorengo herri bazkarian plaza jendez lepo egon zen", adierazi digu Enara Minguezek.