Uztailean 08:30etik 20:30era, 12 orduz jarraian, izango da zabalik liburutegia Errotalden, eta Agorrosinen, 15:00etatik 17:00etara. Abuztuan, ostera, goizez egongo da zabalik Errotalden, 08:30etik 20:30era, eta Agorrosinen, 15:00etatik 17:00etara. Zerbitzua emateko, liburutegiko langileez gain, Xipizaro ludotekako beste begirale bat izango da igerilekuetan uztailaren 14tik aurrera.
Zerbitzu osatua
"Liburuaren egunean-eta San Martin plazara irteten garen moduan, udan igerilekuetara joango gara, jendea dagoen tokira, zerbitzu hobea emate aldera", dio Mila Agirrezabal Udal Liburutegiko arduradunak. Uda sasoian jende gutxiago ibiltzen da liburutegian eta, bestalde, ordutegia ere murritzagoa da; hala, zerbitzua osatzeko, arratsaldez igerilekuetan egongo da liburutegia.
Berdegunean, iturriaren
ondoan, jarriko dituzte liburuok. Horretarako, apalategi, erakustoki
eta mahaiak jarriko dituzte, eta baita ordenagailua ere, maileguak
egiteko. "Hasiera batean, 300 bat liburu jarriko ditugu, eta gero,
behar baldin bada, joango gara osatzen", dio Agirrezabalek. Jende
gaztearendako, batik bat, baina baita helduendako ere egongo dira
liburuak, propio aukeratutakoak.
Taberna ere bai
Agorrosingo igerilekuetan kanpoko berdegunea astelehenetik zabalik dago. Liburutegi zerbitzuaz gain, aurten taberna ere jarriko dute, edariak, kafea eta litxarreriak saltzeko. Izozkien kioskoa jartzen duten ondoan egongo da.