Eskola ibiltariaren 9. edizioa hasi dute gaur Bergaran. Ikasle Abertzaleak-ek antolatuta, Euskal eskola nazionalaren alde egingo dute ikasleek datozen hiru egunetan. Ikasleek eskolan pairatzen duten egoera salatuko dute, gainera. Modu praktikoan ikasteko eskolak izango dira: nora joan, hura ikasi.
Lehenengo eskola
25 lagun bildu dira gau Bergaran hasierako ekitaldian. Ondoren, Bergarako Udaletxean Martin Garitanoren eskola jaso dute han bildutakoek. Euskal Herria Txibertararte gaia izan dute berbagai Udaletxeko aretoan. Gaur, eguena izanda, erantzun xumea izan du eskola ibiltariak; baina, datozen egunetarako lagun gehiago batu eta Azpeitira 60 lagun inguru iristea espero dute.
Eskolek irauten duten hiru egunetan, Euskal Herria bere osotasunean lantzea dute helburua ikasleek. Ibilbidean zeharkatzen dituzten flora, fauna, herriak, eta bertako jarduera sozio-ekonomikoak ezagutzea dute xede, beti ere euskaraz eta eredu pedagogiko ezberdinak landuz.
Telesforo Monzon
Bergaran, Telesforo Monzonen etxea ikusteko aukera izan dute, eta Antzuolan proiektu hezitzaile aurrerakoi baten berri jaso dute. Gero, bazkaldu egin dute. Urretxu eta Azkoitia bisitatuko dute datozen egunetan eta zapatuan Azpeitira iritsiko dira.
Azken jaia
Loiolako basilikatik Xoxote gaina zeharkatu eta Azpeitira helduko dira zapatuan. Han, bertso triki poteoa eta afaria egingo dute. Hasiera batean Gaztetxean kontzertuak antolatzeko asmoa zuten, baina jaialdia bertan behera geratu da. Gorka Zoziaga antolatzaile taldeko lagunak adierazi duen bezala, eskola hauen balio handiena bertan sortzen den giroa da, eta era berean lagunak egiteko aukera azpimarratu du.