Egubakoitzean inauguratu zuten Aroztegiko erakusketa, Aranzadi Zientzia Elkarteko ordezkariak eta Agurne Barruso Bergarako alkatea ere bisitarien artean zirela.
Lourdes Herrasti Aranzadiko kideak azaldu zuen lau ataletan banatuta dagoela erakusketa: hilobi baten gaineko informazioa lortu, hildakoaren familiakoekin harremanetan jarri, indusketa lanak egin, hobitik ateratzeko prozesua eta familiei gorpuen hondarrak entregatu arteko prozesua erakusten dute argazkiek.
Elgeta eta Bergara
Tartean dira, adibidez, Elgetako alkate izandako Iturrikastilloren gainekoa edo Bergarako Ansuategi baserriko hobietan aurkitutako materialaren argazkia, gudari baten plaka eta guzti.
Horrez gainera, Aranda de Dueroko 29 gorpuren hondarrak dituen hobi bat ere irudikatu dute, lurrean.
Hitzaldia apirilaren 14an
Erakusketa apirilaren 18ra arte dago zabalik. Bestalde, apirilaren 14an, Lourdes Herrastik, Aranzadi Zientzia Elkarteko kideak eta gorpuak ateratzeko lanetako asko zuzendu dituen antropologo adituak hitzaldia egingo du, 19:00etan, Aroztegin.