Hilaren 31n, Ikurrinaren aldeko eguna ospatuko dute Bergaran

Bai Euskal Herriari taldeak antolatuta, manifestazioa eta atxikimenduak lortzeko sinadura bilketa egingo dituzte. Ekitaldi nagusia 12:30ean hasiko duten manifestazioa izango da. Buruan pankartaren ordez Ikurrin handi bat eroango dute. "Asmoa da Ikurrina Debagoieneko alkateek eroatea, ibarreko udalekin batera antolatutako ekitaldia da-eta. Gainera, dantzariak, abeslariak eta bertsolariak izango dira protagonista", esan zuten prentsaurrekoan Bai Euskal Herriari taldeko kideek.

Egunean bertan, Geure Ikurrina kanpainaren barruan sinadura bilketa egingo dute. "Dagoeneko 4.000 atxikimendu lortu ditugu, baina gehiago behar ditugu gure helburuak betetzeko", diote antolatzaileek. Atxikimenduak Internet bidez ere egin daitezke www.geureaikurrina.org helbidean.
Bestalde, hilaren 26tik 31ra arte, erakusketa ibiltaria jarriko dute Bergarako kultura etxean, eta hilaren 27an, Euskal Herriaren historiaren gaineko hitzaldia egingo dute.

'Pausu berriak'

Hilaren 31n egingo dituzten ekitaldiekin Ikurrinaren aldeko babesa lortu gura dute. "Euskal Herria desagerrarazteko edozein arma erabiltzeko prest daude; besteak beste, ikur arrotzak inposatzen dizkigute. Espainiar banderak inposaketa eta errepresioa dakar. Era berean, erabakitzeko dugun eskubidea ukatzen digu", esan zuten. Inposaketa horri erantzutea euskal herritar guztiei dagokiela esan zuten. "Horregatik, gaurtik aurrera euskal nortasun ikurren alde pausu berriak emango ditugu".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.