Domekan Bergaran (17:00) jokatuko duten partiduak gatz gutxi izango du. Batetik, ez dagoelako ezer jokoan, eta bestetik, Xala izango delako ordezkatuko ez duten pilotari bakarra. Patxi Ruizek eta Bengoetxeak gogotik ordaindu dute joan den asteko partiduan izandako ezbeharrak. Ruizi pilota sartu zitzaion eskuan, eta bere ordez Haritz Beginok jokatuko du domekan. Hasiera batean Oinatz Bengoetxeak osatu behar zuen Beginorekin bikotea, baina atzoko pilota aukeraketan Bengoetxearen ezker sorbaldak ezetz esan zuen, ez dagoela domekako partidua jokatzeko moduan: "Aste osoa eman dut antinflamatorioak hartzen, eta masajistarekin ere ibili naiz. Berotzen hasi naizenean, baina, berehala konturatu naiz ezker sorbaldak tira egiten didala. Badakit ez daukadala ezer hautsita, baina badirudi joan den asteko kolpearen ondorioz tendoiren bat hezur artean sartu zaidala".
Eulate ere ez
Aspeko pilotariak, berriz, uzkurdura txikia du ezkerreko izterrean, eta finala arriskuan jartzeko motiborik ez dagoenez, medikuak astebeteko atsedenaldia hartzeko agindu dio. Esandakoa, atzo erretratua ateratzeko egindako ahalegina, ezertarako ere ez.