Gaur, egubakoitza, 18:00etan hasiko da Gure Ametsa elkarteak Udalaren laguntzarekin antolatutako II. Pintxo lehiaketa. Ordurako prest izan beharko dituzte hamar parte-hartzaileek lehiaketara aurkeztuko duten pintxoa. Izan ere, pintxo bakarra aurkeztu ahal izango dute, nahi duten osagaiekin eta nahi duten erara prestatuta. Lehiatuko diren tabernak dira:Eusebio, Biko, Ariznoa, Etxalar, Paulaner, Avenida, Agorrosin, Kaiak, Etxagi eta Sirimiri.
Epaimahaia osatuko dute Euskal Gastronomiaren Kofradiako kideek eta antolatzaileek esandako moduan, "ezkutuan" ibiliko dira tabernarik taberna, lehiaketako pintxo guztiak dastatu arte. Modu horretan aukeratuko dituzte hiru pintxo onenak eta irabazlek jasoko dute sari moduan plaka bat.
Herritarren parte-hartzea
Herritarren saria ere egongo da, eta Gure Ametsako kideen esanetan, hori erabakitzeko ezinbestekoa izango da herritarren parte-hartzea.
Herritarren saria erabakitzeko kutxak jarriko dituzte tabernetan, eta baita botoa emateko esku-orriak ere. Bakoitzak boto bakarra eman ahal izango du eta horregatik izen-abizenak ere jarri beharko dira esku-orrian. Boto-emaile guztien artean zozketa egingo dutela aurreratu dute antolatzaileek eta zozketako irabazleak jasoko du bi lagunendako afari edo bazkaria Zumelaga jatetxean.
Bestalde, lehiaketaren sari-ematea egingo dute azaroaren 17an, 19:30ean, irabazle izan diren tabernetan.
Herrian giroa piztu
Herriko tabernariek pintxoak prestatzeko eta pintxo berriak sortzeko duten abilezia jendaurrean erakusteaz gain, pintxoak jateko ohitura bultzatzea eta herrian jai giroa sortzea ere badira ekimenaren helburuak. Hala, trikitilariak ere egongo dira parte hartuko duten tabernen inguruak alaitzen.