Udaleko iturriek azaldu dutenez, hiru horma-hilobi sorta daude kapera ostean, eta hain justu, horietako baten hegalean jarriko dituzte. Kolunbariook aurreko aldea granito beltzekoa izango dute eta hildakoaren izen-abizenak edo leloa zilar koloreko txapa baten idatzita joango da. Neurriari dagokionez, 25x30x20 zentimetro izango dute.
Udal iturriek gehitu dutenez, oraingoz 60 kolunbario jarriko dituzten arren, herritarren eskarien arabera gehiago jartzeko aukera ere badagoela aurreratu dute, beste bi horma-hilobi sortetako hegal banatan, hain justu ere.
Eskariei erantzun
Geroago eta herritar gehiagok hautatzen dute hildakoan erraustea, lurperatzea barik. Hori horrela, errautsok kanposantuan gordetzeko eskariak ere ugaritzen joan dira azken boladan eta eskarioi erantzuteko asmoz hartu du Udalak horma-hilobiok jartzeko erabakia.
Erabilera arautu
Kolunbarioen erabilera arautuko duten behin behineko ordenantzak eginda daudela aurreratu du Agurne Barruso alkateak. Orain, ordenantzok sakon aztertu eta gero, udalbatzak osoko bilkuran onartu beharko ditu. Hori ahalik eta azkarren egin nahi dutela ere azpimarratu du alkateak, "kolunbarioak ipintzen bukatu eta gero, ahalik eta azkarren hasteko zerbitzua ematen", gehitu du Barrusok.
Ordenantzok jasoko dute, besteak beste: kolunbarioan errautsak gordetzeak izango duen prezioa, emango zaien erabilera, zer gauza eta nola sartu ahal izango diren, eskaerak non eta nola bideratu beharko diren eta errautsak kolunbarioan edukitzeko denbora.