Ekitaldia, kultura etxean
Ekitaldia 19:00etan izango da, kultura etxeko erakusketa aretoan, eta han batuko dira lehiaketako irabazleak. Hala, hantxe izango dira lehen saritu Alaitz Sarasola ordiziarra; bigarren saria eskuratu duen Karlos Aizpurua oiartzuarra; Iraitz Salegi, Bergarako gutun onenaren saria jaso duen gaztea; Josu Gonzalez 26 urtetik beherakoendako saria jaso duen bergararra eta Ibon Segura eskoriatzarra, SMS sariaren irabazlea.
Sariak banatuko dituzte Oier Bolibar Jarduneko presidenteak, Maitane Montiel eta Irati Alberdi epaimahai gazteko kideek eta Nerea Mendizabal eta Itsaso Mendizabal Jarduneko teknikariek.
Ekitaldia urterokoaren antzekoa izango da: irabazleetako bakoitzak bere gutuna irakurriko du eta gero saria jasoko dute. Ekitaldiari amaiera emateko, luntxa egongo da bertaratzen diren guztiendako.
Kopuruak behera egin du
Aurten 38 gutun jaso dituzte, Gipuzkoatik gehienak; jasotako SMS mezuak, berriz, 14 izan dira. Jarduneko ordezkariek azaldu bezala, azkeneko bi urteetan behera egin du jasotzen diren gutunen kopuruak, ez aldiz, kalitateak.