0-6 urte artekoendako gunea San Martin Eskola eta Ipintza Institutuen jolasleku eta aparkalekuetan jarriko dute. Bestalde, 6-12 urtekoendako gunea Santa Marina parrokia ondoko aparkalekuan eta zapatuetan merkatua egiten zen plazan egokituko dute.
Festaren gune nagusia San Martin plazan jarriko dute. "Herriko plazan jarriko dugu oholtza nagusia, eta han egingo dituzte kontzertuak. Bestalde, berrikuntza moduan, kultur aniztasunaren aldeko apustua egin gura dugu, eta gune berezi bat jarriko dugu Bideberrin eta pilotaleku ondoko plazatxoan. Jaiaren aurreko egunetan gai horren inguruko hainbat ekintza egingo ditugu", esan zuen gurasoen elkarteko kide Usoa Urbietak prentsaurrekoan.
Matrikulazioa ia bikoiztu
Ekainaren 7an egingo duten festaren helburu nagusia Euskal Eskola Publikoa aldarrikatzea da. "Eskola eredu honen alde egin genuen gurasook ozen aldarrikatu gura dugu Euskal Eskola Publikoa: euskalduna delako, kalitatezko hezkuntza ematen duelako, aniztasunaren aldeko apustua egiten duelako, eta irakasle eta gurasoen arteko lankidetza bultzatzen duelako", esan zuen Urbietak. Horren harira, esan zuen San Martin eskolan matrikulazioak ia bikoiztu egin direla azken bederatzi urteotan (2000. urtean 267, eta 2008. urtean 473).
Leloa eta logotipoa
Leloa eta logotipoari buruzko azalpenak ere eman zituzten agerraldian. "Aurtengo leloak eta logotipoak gure eskola eta jaia irekia eta modernoa dela erakusten dute. Kolore bizien eta beroen bidez gurasoak, gazteak eta umeak erakarri gura ditugu. Bestalde, Obatu hitzarekin Eskola Publikora erakarri gura ditugu herritar guztiak", esan zuten. Horregatik guztiagatik, ibilbide itxia egin ordez, jaia herri guztira zabaldu gura dute lau guneekin: "Festa irekia egingo dugu, guztiek parte har dezaten".