Atzo, astelehena, iluntzeko zortziak inguruan izan ziren gertakariak. Herriko saltoki batetik Ertzaintzari deitu zioten, gazte talde batek hainbat produktu hartu eta ihes egin zuela esanez. Ertzainek, bertaratu zirenean, gazteek korrika alde egiten zutela ikusi eta harrapatzea lortu zuten. Atxilotu zituzten tokitik saltokira arteko bidean, garbiketarako 30 bat produktu aurkitu zituzten, zakarrontzietan botata. Dirutan, 400 euro inguru eraman zituzten, saltzaileen esanetan.
Atxilotuek 18, 19 eta 21 urte dituzte. Ertzain-etxera eraman zituzten, beharrezko eginbide polizialak burutu eta Gipuzkoako hiriburuko Guardiako Epailearen esku uzteko.