Ertzaintzak gizonezko bat atxilotu du emaztea erasotzea leporatuta

Atzo, domeka, iluntzean gertatu zen ustezko erasoa, zortziak jotzeko minutu batzuk falta zirenean. Arrasateko Ospitalera eraman zuten emakumea zauriak artatzera, eta bertan jarraitzen zuen gaur goizean esku bateko hatz batean ebakuntza noiz egingo zain.

Iluntzeko zortziak aldera emakume bat telebista ikusten ari zen bere etxean eta, senarra etorri zenean, eztabaida izan ondoren, gizonezkoak zenbait kolpe eman zizkion emazteari buruan, Ertzaintzak bidalitako informazioaren arabera.
               
Iturri horrek berak dio, jarraian, emakumeak senarrak oparitu zion lore-sorta bat hartu eta plastikozko poltsa batean sartu zuela, ontzian zegoen ura lurrera botaz.          
 
Prentsa oharrean gaineratzen denez, senarrak, hori ikusita, lurrera bota zuen emaztea eta eskaileretara indarrez atera zuen, etxeko giltzak kenduta. Atezain automatikora zenbait aldiz deitu ondoren, eta senarrak atea irekitzen ez ziola ikusita, ustezko biktima Bergarako Ertzainetxera joan zen, gertatutakoa salatzera.                                                      
 
Bertara iritsitakoan, emakumea Arrasateko Eskualde Ospitalera eraman zuten zauriak artatzera, eta bertan ingresatuta jarraitzen zuen gaur goizean, esku bateko hatz batean ebakuntza noiz egingo zain. 
                                              
Atxilotuak polizia aurrekariak ditu eta gaur bertan ziren Bergarako  Guardiako Epaitegiaren esku jartzekoak.




ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.