Bergarako Udal Artxiboak herriko historiari buruzko ikerketak egiteko laguntzak emango ditu bigarren urtez. Helburua da ikerketa historikoak sustatzea.
Arantzazu Oregi artxiboko arduradunak azaldu bezala, ez da lehiaketa bat. "Ikerketa bat egin gura duenak proposamena aurkeztu dezake. Ondare, Turismo eta Informatika batzordeak aurkeztutako ideia horiek aztertu egingo ditu eta interesa dutenak diruz lagunduko ditu Udalak", azaldu du Oregik. Ikerketa hauek laguntzeko diru partida bat du Udalak eta ikertzaileak egindako balorazio ekonomikoa hartuko da aintzat dirua banatzeko. "Diru hori hainbat zatitan banatu daiteke, proiektuen arabera", zehaztu du Arantzazu Oregik.
Bergara herriari edo herritarrei buruzko ikerketa egin gura duenak, datu hauexek aurkeztu behar ditu Udaleko erregistro orokorrean: proiektuaren laburpena, proiektuaren oinarrizko jarraibideak, metodologia, iturriak, lana egiteko epea, balorazio ekonomikoa eta hizkuntza.
Artxiboa sarean
Bergarako Udal Artxiboak sarean jarri zuen bere materiala maiatzean. Edozeinek etxeko ordenagailutik kontsulta ditzake artxiboko fondoak edo albisteak. Helbidea da: www.bergarakoartxiboa.net