Gaur, astelehena, UNEDeko Patronatua osatzen duten erakundeek bilera egingo dute Donostian, eta lortutako akordioaren berri emango diete komunikabideei bileraren aurretik. Diputazioaren aldetik Markel Olano eta Maria Jesus Aranburu Kultura diputatua; Bergarako Udala ordezkatuz, Agurne Barruso alkatea; Kutxaren partetik Carlos Ruiz; Enrique Moreno UNED ikastetxearen partetik; Juanjo Alvarez UNED Bergarako zuzendaria; eta Luis Elizegi Patronatuko idazkaria izango dira aipatutako bileran.
Permuta
Patronatuaren eta Hazienda ministerioaren arteko akordioak eraikinen permutaren gaia atera dezake mahai gainera. Izan ere, Bergarako Udala interesatuta dago Arrizuriaga jauregia Patronatuari emateko eta ordainetan Errege Seminarioa jasotzeko.
Negoziazio luzeak
Joan den urteko urrian lortutako akordioaren arabera, UNED-Bergara Patronatuak erabaki zuen Madrilgo gobernuari Erret Mintegia milioi baten truke erostea. 2005. urtetik lagapen egoeran egon da Errege Seminarioa, eta aurrerantzean, esan bezala, Patronatuaren jabetza izango da. Bertako erakunde bakoitzak, Patronatuan duen partaidetzaren arabera egingo du diru ekarpena: Bergarako Udalak 100.000 euro, Kutxak 270.000 eta Gipuzkoako Foru Aldundiak 630.000 euro.