Bat baino gehiago zur eta lur gelditu zen Erantzun taldearen emanaldi bortitzarekin. Anestesiaren kantu batek bataiatu zuen Zarauzko taldeak mutur-muturreko hardcorea egiten du, ia guturala; eta askorentzat ez da ohikoa halako doinu gogorrak entzutea.
Iaz kaleratutako Hazia erneltzen duen tanta laneko hainbat pieza jo zituzten eta, bitxikeriak bitxikeri, Motörhead-en pieza bat gordintzen saiatu ziren; eta Anestesia taldearen Erantzun kantua, hain justu, bertsioneatu zuten. Une horietan, gainera, Zarauzko lagunek eta hainbat bergararrek abeslaria besotan hartu zuten, giro onaren isla.
Bap!-en garapen bikaina
Jarraian, Andoain aldeko beteranoak igo ziren taula gainera. Jakina da Abrego anaiak eta dagoeneko taldea utzita daukan Drake Bap! hardcore taldetik datozela; eta talde haren garapentzat har dezakegu Inoreneroni palindromoa. Bai, hardcoretik haratago joan dira, baina post-hardcore erritmo bizi eta aldakorrera eta diskotik diskora bestelako ñabardurak gehitzen joanez. Hara non, giro ilun zein gitarra zorrotzak eta melodiak batzen dizkiote emaitzari Borjari esker eta Enekoren ahotsa marka da dagoeneko.
Mikel bateria jotzaileak gidatzen du makineria, itzela da-eta makilekin; Borjak badirudi Alvini abizena daukala gitarra-zerra eskuan hartzen duen bakoitzean, eta Marianok bestelako pultsua ematen die kantu eta giroei. Eta, azkenik, zer esan Eneko abeslariaz? Mila gudatan zaildutako abeslaria, estilo oso pertsonala eta umore kutsakorra daukana. Emanaldi bikaina, erabat!