Eguneko zentroa egokitzeko lanak asteon hasiko ditu Aldundiak

Azaldu dutenez, abuztuaren 25ean esleitu zizkioten lanok Goitu enpresari 263.542 eurotan eta Segurtasun Plana ere onartuta dagoela aurreratu dute Aldundiko iturriek.
Nabarmen aldatuko da eguneko zentroa, batik bat, espazioari dagokionez: 10 erabiltzailerendako lekua izatetik 25endako lekua izatera pasatuko da. Hain justu, espazioa irabaztea da lanok egitearen arrazoia, izan ere, eskariak gora egin du eta oraingo egoitzak ez zituen beharrak asetzen.
Lanak bukatuta egongo dira datorren urteko urtarril edo otsailean. Bien bitartean erabiltzaileak Antzuolako eguneko zentrora eroango dituzte. Hain justu, badira hilabete batzuk hara eroaten dituztena.    
Eguneko zentroaz gain, Boni Laskuraingo eraikinean egoitza du San Joxepe erretiratuen elkarteak. Eguneko zentroa handitzearekin batera, espazioa galdu egingo dute erretiratuek. Hala, Udalak berrantolatu egingo du  erretiratuendako eremu hori. Lanok egingo dira eguneko zentrokoekin batera.