Martin Etxeberria Kirol zinegotziaren esanetan, "herritar ugari" ibili da kanpoko igerilekuan eta hori "halako igerileku baten beharra zegoen seinale da", zinegotziaren ustez.
Kirol batzordeak badaki ere hobetu beharreko hainbat gauza ere badirela. Martin Etxeberriak halaxe esan du: "Garbi geneukan aurtengo udako denboraldirako martxan egon behar zela kanpoko igerileku berria, eta horrek eragin du gauza batzuk apur bat presaka egitea. Ondorioz, badakigu akats batzuk egon direla, besteak beste, berdegunean". Hain justu, berdegunearen eskuineko aldea lokaztuta egon da eta herritar ugari kexatu dira horregatik Agorrosingo harreran.
Etxeberriak azaldu duenez,oraindik ez dakite zergatik gertatu den hori: "Uste dugu belarra jarri aurretik lurra gehiegi zanpatu zutela eta ura ezin izan dela iragazi. Eta azalean geratu dela lokatza sortuz". Eta gaineratu du: "Baina benetako arazoa zein den jakingo dugu Antzibar enpresak lurra jasotzen duenean,ordura arte ez. Jakinaren gainean daude eta berehala hasiko dira lanean". Horrekin guztiarekin, akats hori eta egon diren beste batzuk datorren urterako konponduta egongo direla aurreratu du.
Taberna
Tabernaren gaineko kexak ere jaso dituztela azaldu du zinegotziak. Hain justu, domeketan ez dutelako bazkaltzen eman. Horren harira esan du tabernaren funtzionamenduaz gain, espazioa beste modu batera antolatzeko erabakia ere hartu dutela. Udako eta neguko denboraldia bereizteko moduan antolatuko dute eta aztertzen dihardute hori nola egin. Aukeretako bat da pareta mugikorrak jartzea.
Jende asko
Agorrosinera udan hurbildu den jende kopuruari dagokionez, batez beste 1.150 sarrera zenbatu dituzte eguneko. Hilabetez hilabete begiratuz gero, ekaineko egunik jendetsuena 30a izan zen. Egun horretan 2.151 sarrera zenbatu zituzten. Egunik tristeenean, berriz, 288.
Uztaileko –eta udakoa ere bai– egunik jendetsuena, uztailaren 15a izan zen, 2.339 sarrerarekin. Eta uztaileko egunik tristeenean 401 sarrera egon ziren. Abuztuari dagokionez, egunik arrakastatsuena 31 izan zen 1.781 sarrerarekin, eta tristeenean, 350 sarrera zenbatu zituzten.
Osasun-laguntza
Uda osoan 44 osasun-laguntza egin dituzte Agorrosinen. Gehienak izan dira ebaki eta kolpeengatik; horietatik –39– kanpoko igerileku eta berdegunean. Bestetik, lauk baino ez dute ekintza gunetik kanpoko laguntza behar izan.