Udalak erabaki du herriko lau parkeak ixtea haize handia egiten duenean. Lorezainen arduradun Arkaitz Tolosak azaldutakoaren arabera, herritarren segurtasuna bermatzeko asmoz hartu dute erabaki hori, "arrisku potentziala dago-eta".
Usondo, Errotalde, Errekalde eta Arrizuriaga parkeak dira itxiko dituztenak. Gainera, ondo seinaleztatuta egongo direla gehitu du lorezain buruak.
Osasun azterketa
Herriko zuhaitzei azterketa fitosanitarioa egingo zaiela ere aurreratu du Arkaitz Tolosak: "Azterketa horrekin jakingo dugu osasuntsu dauden ala ez eta horren arabera hartu beharreko neurriak erabakiko ditugu".
Azterketaren emaitza dena delakoa izanda ere, haizea egiten duenean parkeak itxi egingo direla azpimarratu du Tolosak, "zuhaitza osasuntsu egon arren, arramak erori egin daitezkeelako".