EAE-k emandako pausuak
Hauteskundeetako emaitzak ikusita, Bergarak aldaketaren aldeko botoa eman duela uste du EAEk eta hori aintzat hartzeko konpromisoa hartu zuen. "Hori kontuan izanda, hemendik aurrerako bidelagunak zehazteko irizpideak jarri ditugu hasteko. Hiru dira irizpide horiek: alderdi abertzalea izatea, politika aurrerakoia egitea eta prozesu demokratikoaren aldeko jarrera baikorra izatea. Horrela, bi aukera ikusi ditugu: Aralar eta EA. Bi alderdi horiei eskaini diegu udal gobernua osatzea", azaldu du EAEko Agurne Barrusok. "EAJ eta PSE-EE-rekin ere elkartu gara, gure irizpideak azaltzeko eta udal funtzionamenduari buruz hitz egiteko", jarraitu du Barrusok.
Aralar eta EA
Bestalde, Aralarrek herri batzarra egin zuen martitzenean eta hantxe eztabaidatu zuten zein erabaki hartu. "Gu prest gaude EAErekin batera gobernatzeko. Hurbiltasun ideologikoa dugu eta bion programak antzerakoak dira. Hala ere, zapatutik aurrera 30 egun daude Udal gobernua osatzeko eta epe horretan programa bateratu bat egiten saiatuko gara. Lortzen badugu, baiezkoa emango diogu EAEk egindako proposamenari", zehaztu du Mikel Etxaniz Aralarreko zerrendaburuak. Dena den, zapatuko inbestidura egunean botoa nori emango dioten garbi dute, ordea: "Agurne Barrusori emango diogu alkate izateko botoa, bera izan da bozkatuena eta", esan du Mikel Etxanizek.
"EAJrekin ere elkartu gara. Lehengo udal gobernua osatzea proposatu digute, EArekin batera, baina ikusi dugu jendeak aldaketa bozkatu duela eta ez genuen nahi alkatetza EAJri ematea. Hala ere, gure arteko harremanak onak izaten jarraitzen dute", gaineratu du Etxanizek.
EAk ez du oraindik erabakia hartu baina euren eta EAEren programak ikusita, iritzi ezberdinak eta programetan ezberdintasunak dituztela esan du Lauri Askargortak. "Batez ere hirigintzan ditugu ezberdintasun handienak. Hala ere, oraindik ez diogu ezetzik esan proposamenari. Datozen egunetan aztertuko dugu hobeto", zehaztu du. Zapatuan EAko hautagaiaren alde bozkatuko duela ere esan du.
EAJ, oposizioa egiteko prest
EAJko German Muruamendiarazek onartu du lehengo formula errepikatzen saiatu direla Aralar eta EArekin, baina ez dela posible izan "Aralarrek ez duelako nahi alkatetza kentzea zerrenda bozkatuenari". Muruamendiarazek "normala" ikusten du oposiziora joatea, baina elkarlanean jarraitzeko gertu daudela esan du: "Oposizio eraikitzailea egin nahi dugu, ez eztabaidatsua". Zapatuan, euren hautagaiari emango dio botoa EAJk.