Bilkuren maiztasuna
Ohiko osoko bilkurak hileko azken astelehenetan egingo dira 19:30ean eta gobernu batzordea astelehen guztietan bilduko da, lehen bezala. Gobernu batzordean alkateak eta beste bost zinegotzik (Minguez, Goiti, Guridi, Etxeberria eta Etxaniz) izango dute botoa, baina udalbatzako zinegotzi guztiak daude gonbidatuta parte hartzera.
Udalaren ordezkariak
Bestalde, alkateordea eta Udalak beste erakunde batzuetan izango dituen ordezkarien onarpena ere onartu du udalbatza berriak: Debagoieneko Mankomunitatean izango dituen hiru ordezkariak: Agurne Barruso, Enara Minguez eta Iñigo Iñurrategi; Mendi nekazaritzan, Maite Guridi; Ur partzuergoan, Agurne Barruso; Euskaltegiko Fundazio publikoan, Maite Guridi eta Mikel Elkoroberezibar; Suradesan eta Debagoieneko Industrialdeko Administrazioa Kontseiluan, Agurne Barruso eta Roberto Marinez eta Haurreskolako batzar nagusia, Agurne Barruso. "Erakunde bakoitzerako, gaiarekin lotura duten arduradunak izendatzen saiatu gara", argitu du alkateak.
Alkateordeen izendapenak ere egin dituzte: Minguez, Etxaniz, Goiti, Guridi eta Etxeberria.
Liberatutako karguen soldatak
"Soldatak jaisteko, hiru irizpide jarraitu ditu EAEk: liberatuek Udalean sartu aurretik zuten soldata erreferentzia moduan hartzea, aurreko agintaldiko soldatak jaistea eta bi liberatu egon arren, inoiz ez gainditzea aurrekoak zuen kostua", azaldu du alkateak.
Agintaldi berriran bi pertsona egongo dira liberatuta Udalean: Agurne Barruso eta Enara Minguez. Agurne Barruso alkatearen soldata gordina urteko da 35.631,54 euro (2.545,11 euroko 14 paga) eta Enara Minguezena 20.091,40 euro urtean (1.435,10 euroko 14 paga). Aurreko agintaldiko liberatu bakarraren (alkatea) soldata gordina urteko zen 62.189,46 euro (4.442,09 euroko 14 paga). Horrela, agintaldi berriko bi liberatuek 55.722,94 kobratuko dute urtero, aurrekoak baino gutxiago. Soldata eta gizarte segurantzako gastuak izango dira: 73.777 euro, bi lagunena; aurrekoarena, 73.838 euro. Datozen hiru urtetan, udaletxeko langileen igoera bera izango lukete liberatuek.
