Helburua da autoak erdigunean denbora luzez aparkatuta ez egotea. Dena dela, iraupen desberdinetako guneak egongo dira. San Martin plazan 30 minutuz aparkatu ahal izango da, erdiguneko kaleetan 90 minutuz eta Ibargaraiko eta azoka pareko aparkalekuetan hiru orduz. Behin denbora hori agortuta gainera, ezingo da autoa beste TAO eremu batera mugitu hurrengo hiru orduetan.
Ordenantza berria onartuta, berau martxan ipintzeko azpiegitura lanak hasiko ditu orain Udalak. Abuztuan zehar TAO eremua urdinez margotuko dute eta irailaren hasieran beharrezkoak diren makinak ipiniko dituzte, irailaren 20rako martxan egon daitezen. Agurne Barruso alkateak azaldu du, bestetik, irailean herritarrendako informazio kanpaina bat ipiniko dutela abian eta TAO eremuan eta alde zaharrean bizi diren herritarrendako txartel bereziak banatuko dituztela: "Bertakoendako txartelak bereziak izango dituzte baina, egunero txartela kendu eta ipini egin beharko dute, denbora luzez autoa gune horretan aparkatuta eduki ez dezaten".
Alkateak azaldu du zenbait azterketa egin ostean bertan behera geratu dela, momentuz behintzat, Ibargarai kalean egin nahi zen lurpeko aparkalekuaren proiektua, Udalak dirurik ez duelako. Hori horrela, doako TAO sistemarekin Bergarako erdigunean dagoen aparkaleku arazoa hobetzea espero dute. Dena dela, argitu du behin-behinekoa izango dela, eta emaitzen arabera erabakiko dutela sistema behin betiko ezarri edo ez.