Eguaztenean Bergara Zenbakitan webgunea aurkeztu zuten herritarren aurrean. www.bergara.net helbidean kontsulta daiteke eta herriko askotariko datuak batzen ditu. Zortzi arlotan banatuta daude datuok eta horien gaineko irakurketa egin zuen Amaia Elizagarate Aztikerreko soziologoak osoko bilkuren aretoan.
Hainbat datu aipagarri
Batik bat lau datu azpimarratu zituen Elizagaratek: zahartze tasa altuko herria dela; jaiotza tasa baxukoa; biztanleriak azken urteetan nabarmen egin duela behera eta lan merkatuari dagokionez, langabeziaren igoera eta langabetuaren perfila.
Bereziki zahartze tasa azpimarratu dute Aztikerren. Izan ere, Debagoieneko zahartze indize altuena duen herria da, eta Gipuzkoa zein Euskal Herriarekin alderatuz gero ere Bergarakoa altuagoa da. 60 urtetik gorako 175 pertsonako 100 gazte daude herrian.
Herritarren zerbitzura
Udalaren eskariz batu ditu datuok Aztikerrek eta helburua da modu ulerterrazean herriarekin lotutako datu estatistikoak herritarren zerbitzura jartzea, euren lanerako tresna izan daitezen.
Erakunde administratiboek –INEM, Eustat...– argitaratutako datuak dira eta Aztikerrek egin duena da batu eta oso modu errazean aurkeztu. Debagoienarekin, Euskal Herriarekin, Europaren eta munduarekin konparatuta agertzen dira Bergarako datuak.