Cyrill Schmiedlin organo-jolea zapatuan San Pedron

Organo erromantikoaren zikloaren barruan, Cyrill Schmiedlin organo-jole suitzarrak emanaldia egingo du bihar, zapatua, San Pedro parrokian, 20:00etan.

Latin-greko letra klasikoetako batxilergoa egin ondoren, Schmiedlin organo klaseak jasotzen hasi zen. Diploma eta sari ugari eskuratu zituen eta berehala lortu zuen oso izen ona kontzertista gisa. Ikasten jarraitzeko jasotako laguntzei esker, organo frantsesaren literatura ikasi ahal izan zuen Daniel Roth irakaslearekin batera, Parisen, eta ondoren, Estrasburgoko Kontserbatorio Nazionalean.


Lucernako Musikhochschulen amaitu zituen Schmiedlinek ikasketak, eta musika sakratuan, gregorianokantuan eta zuzendaritzan espezializatu zen. Gaur egun, Basileako St. Marien elizako organo handien titular eta kaperako maisu da. St. Marien elizako pulpitua garrantzitsuenetakoa da Suitzako musika sakratuari dagokionez. Schmiedlin bere sendiarekin bizi da Basilean, eta musika-irakasle eta abesbatza handien zuzendaria da han.

Zapatuko emanaldiko egitarauari dagokionez, hiru pieza interpretatuko ditu organo-jole suitzarrak: Cesar Franck-en Troisième Choral en la mineur; Maurice Durufléren Sicilienne, extrait de la Suite op.5; eta Charles-Marie Widor-en Symphonie VI Op.42.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.