Baikalskie Volni taldeak Portugaleteko 36. Folklore Jaialdian parte hartu du eta handik Bergarara etortzera gonbidatu zituen Udalak. Esker ona adierazteaz gainera, Agurne Barruso alkateak oroigarri bat eman zien taldeko kideei.
Buriatiako dantzariek lehenengo minututik harrapatu zituzten bergararrak. Gehienek Buriatiako Errepublika non dagoen ere ez zekiten, baina gustuko zuten ikusten eta entzuten ari zirena; txalo zaparradek behintzat, horixe adierazten zuten.
Musikaren dotoreziak eta kalitateak eta dantzen ikusgarritasunak berezi egin zuen atzoko emanaldia, berehala ahazten ez diren horietakoa.
Dantzariek bost dantza ikuskizun egin zituzten, jantzi erregional desberdinak erakutsiz. Dena dela, zalantza barik, ipotx moduko panpin batzuen dantza dibertigarriek eragin zuten barre eta algara gehien. Baikalskie Volni taldeari esker Buriatia aurrerantzean ez da horren hitz arrotza izango Bergaran, eta zuzenean kolore, bizitasun eta alaitasunarekin lotuko da.