Urteko lan guztia zuten jokoan eta ondo egin dituzte egin beharrekoak. Aurkaria gogorra zen, kategoriaz igotzeko borrokan zegoen Kostkas taldea, hain zuzen ere. Asko sufrituta, azkenean txartela etxera ekarri dute Beitiaren mutilek.
Partidu gogorra
Norgehiagokaren 15. minutuan egin du Urko Irizarrek partiduko gol bakarra. Eskerrak hortik aurrera gauzak asko gogortu baitira. Bederatzi jokalarirekin amaitu du norgehiagoka Beitiaren taldeak, tartean lesionatu batekin. "Aurkariak presio handia egin du, baina aurre egitea lortu dugu eta pozik gaude", esan du Jose Luis Beitia entrenatzaileak. "Denboraldiko helburu nagusia gauzatu dugu".
Taldeak, gainera, sailkapeneko lehenengo postuan amaitu du txapelketa. Ondorioz, Gipuzkoako txapelketako finala jokatuko du Sanpedrotarrak taldearen aurka. "Berez, datorren astean da partidu hori jokatzekoa, baina atzeratzeko eskatuko diegu Sanpedrokoei", aurreratu du Beitiak. "Ez dute onartuko, baina eskaera egingo dugu".