Jendeari kirol mota hau gerturatu eta erakusteko aukera aparta izan zutela adierazi digu Mikel Usabiaga Beti-Busti elkarteko kideak. "Kirolarien parte hartzea nabarmendu gura dugu, baita bertara gerturatutakoen laguntza ere. Guzti hau aurrera eramatea posible egin dutenei eta laguntza eman digutenei eskerrak eman nahi dizkiegu". Kirolariak oso pozik azaldu ziren. Bertan izan zen Ander Elosegi irundarra. Lehen mailako kirolaria da Elosegi. Beijingo Joko Olinpikoetan laugarren postua eskuratu zuen kanoa modalitatean. "Iniziatiba polita antolatu dute. Esperientzia aparta izan da. Kirol hau ez da oso ezaguna eta indartu egin behar da jendeak ezagutzeko". Elosegik adierazi du lan handia egin behar dela, baina sakrifizioak merezi duela. Orain, Londresko Joko Olinpikoetarako prestatuko da.
27 parte hartzaile
Modalitate ezberdinak ikusgai: kanoak eta kayak, banaka edota binakako modalitatean. Slalom paraleloko probaren azkartasunak aho bete hortz utzi zituzten ikusleak. Azkartasuna baita proba honek daukan zailtasuna eta ikusgarritasuna. Proba berezia zen eta kuriositate handia sortu zuen. Gainera, lehen aldia da horrelako slalom paraleloko proba bat gauez egiten dena, bai Euskal Herrian eta baita Espainiako Estatuan ere. "Berrikuntza handia izan da, gauez eta ibaia argiztatuta. Musika eta argiteriak ikusgarria egin du proba eta jende asko erakarri du. Jendearengana hurbiltzeko bide bikaina izan dela uste dugu".
Beti-Busti elkartea
Interesatuek eta Beti-Busti elkarteko kide izan nahi duten guztiek ateak zabalik dituzte. Astelehenetik barikura, 17:30etik aurrera, Labegaraietako kiroldegiaren atzealdeko eraikinean izango dira elkarteko kideak bertaratzen diren guztiei arreta zerbitzua emateko.
Bestalde aipatu, zozketatutako saskia Iñaki Alberdiri tokatu zitzaiola. Gainera, elkarteko kideek adierazi dute, egutegia eskuratu nahi dutenek 943 76 14 95 telefonora deitu beharko dutela.
Sailkapena
MUTILAK
Seniorrak
Kayak modalitatea Aritz Fernandez
Kanoan banaka Ander Elosegi
Kanoan binaka Goikoetxea bikotea
Kadeteak
kayak modalitatea Xabier Jauregi
NESKAK
Seniorrak
Kayak modalitatea Irati Goikoetxea
Kanoan binaka Otaño-Molino bikotea