Berriketan egitasmoan interesa dutenendako izenematea zabaldu dute berriz. Jardun euskara elkarteak, Udaleko Euskara zerbitzuak, Udal Euskaltegiak eta AEK-k bultzatutako ekimena da, ingurune euskaldunak sortu, indartu eta zabaltzeko ahaleginean.
Euskara bultzatzea helburu
Ekimenaren helburua da euskara bultzatzea eta zabaltzea, lagun euskaldunak eskainiz, euskaraz ikasten ari direnei, ikasi dutenei edo hitz egiteko aukera eta ohitura gutxi dutenei.
Hori horrela, euskaraz berba egiten duten boluntarioak euskara praktikatu nahi dutenekin elkartuz, euskaraz berba egitea errazten duen proiektua da Berriketan. Izan ere, erabiltzea da hizkuntza bat ondo ikasteko modurik onena, eta proiektu horrek hori ziurtatzen du; astean ordu batzuetan euskaldun berriak (euskaltegitik kanpo) euskal hiztunekin berriketan egotea.
Izenematea, jardunen
Egitasmoan parte hartzeko interesa dutenek Jardun elkartera jo dezakete (kultura etxea) edo 943 76 36 61 telefono zenbakira deitu (Maitane).